ساعات كتير لما بنفتقد شخص معين فى حياتنا بنتمنى اننا نرجع معاه تانى ,نرجع نتكلم معاه نسمع صوته نسمع ضحكته حتى سكوته
وحتى لو كان الشخص دا مليان عيوب وحتى ممكن منشوفش ميزاته دى خالص بس مهما كان ومهما حصل بنتمنى نرجع تانى معاه حتى لو كان فى ضرر لينا منه بس العشره فعلا مهما كانت حلوه او وحشه بتاثر فينا من جوانا ,حتى فى صوتنا وقلوبنا ونظره عيونا بتبقى شايله سؤال عن الشخص دا ولما بنشوف حد يعرفه بيبقى نفسنا نجرى عليه نساله عنه ونعرف اخباره ونطمن عليه دايما بيبقى فى حنين للماضى من جوانا مهما كان مر بينا بس برضوا دا جزء منا حياتنا كلها اتاثرت بكل موقف وكل لحظه مرت علينا فى الماضى من عمرنا ...
الله سبحانه وتعالى خلقنا بنعم كتير اوى ودا من فضله علينا ومن النعم دى ومحدش يقدرميفكرش فيها نعمه نسيان الالم وتذكر السعاده انا بحب اسميها كدا لان المفروض دا اللى يحصل اننا ننسى المواقف والوحشه ونفتكر دايما الموقف الكويسه فى حياتنا ...
طيب ازاى دا بيحصل انت ممكن فى عقلك وتفكيرك تربط اشياء معينه بذكريت ومواقف معينه ,يعنى مثلا مممكن تشم رائحه برفان معين ومجرد انك تحس بريحته تفتكر شخص معين كان دايما بيحط البرفان دا وتفتكر بشكل تلقائى موقف معين حصل مع الشخص دا وممكن تضحك ويمكن الناس تقول عليك مجنون بس دا اللى بيحصل وممكن لما تسمع شعر او كلمات اغنيه معينه تفكرك بموقف تانى وشخص تانى ...
طيب هل النسيان فعلا حل لكل المشاكل اننا ننسى كل حاجة وحشه وكل موقف احنا شايفين انه وحش دا هو الحل ,انا بحس انه هروب طيب ليه مفكرش فى الحاجة دى واشوف ايه اللى كان وحش فيها واحاول اغيره واحاول معملوش تانى اما لو هربت بالنسيان هرجع تانى واغلط تانى نفس الموقف وارجع تانى ازعل واضايق يبقى موصلتش لحل بالعكس دا انا تعبت اكتر واكتر ...
الموضوع مش موضوع ان الواحد غاوى نكد ولا الكلام دا اللى ممكن تكون جه فى تفكيركم دلوقتى بس مش عيب ان كل موقف يمر عليك تحاول تستفاد منه حتى لو كان الموقف دا سلبى بس برضوا تستفاد انك مش تعمله تانى ومش عيب انك تحكى لحد لى سبيل الفضفضه والمشاركه فى الحياه اه هى الناس مش ناقصه وفيها اللى مكفيها بس الاحساس بالمشاركه فى الحياه بيهون حاجات كتير اوى ...
خلص الكلام دلوقتى
