والله اجوعكم شويه
طريقه عمل المكرونه بالبشاميل
كتير بيحبها وانا كمان بحبها
هقولكم طريقتها يمكن حد يحب
يعملها فى يوم من الايام
اولا المقادير:
1 كيلو مكرونه اقلام
1/2 كيلو لحم مفروم
2 بصله متوسطه الحجم
3/4 كيلو لبن
معلقتين دقيق
عدد 3 بيض
وشويه البهارات بقى
عدد 4 حبات طماطم متوسطه الحجم
<<<<<<<<<<<<
>>>>>>>>>>>>
طريقه العمل :
اولا : اللحمه
هتحطى يا ستى اللحمه فى حله كدا على النار
وتسبيها مع نفسها كدا ربع ساعه
وبعدين تضفى ليها البصل المفروم
وتبليها (يعنى تحطى البهارات + الملح ) وبردوا تسبيها
على النار المتوسطه وبعد كدا لما تحسى ان خلاص اللحمه
اتشربت الميه هى و البصل ووصلت للنضج الكويس ليهم
ولى واعرف ازاى ياستى اتعبى كدا ودوقيها
وبعد كدا فى ناس بتحب تعملها بطماطم وفى ناس بتحبها
تكون من غير طماطم بس بالطماطم احلى
يبقى حطى الطماطم بعد ما تضربيها ضربا شديدا قطعيها من الضرب
وتحطيها عليها وبردوا تسيبها لحد ما اللحمه تتعصج
( ودى بقى هى اللحمه المتعصجه)
<<<<<<<<< >>>>>>>>>
ثانيا : البشاميل:
اولا حطى يا سيدتى 2 ملعقه كبيره سمن على النار وسبيها
لحد ما تسخن كويس اوى لازم تسخن كويس
وبعد كدا ضيفى الدقيق وانتى بتضيفى الدقيق ايدك شغاله بالتقليب
علشان الدقيق مش يكلكع ( يعنى ببساطه مش يعمل كور
حنا مش فى ملعب هنا) ولحد ما تحسى ان الدقيق وصل للون
الدهبى كدا مش اتحرق ارفعيه من على النار وابدئى ضيفى
لبن برضوا بالتقليب يعنى تضيفى شويه لبن وتقلبى معاه لحد
ما توصل للقوام المتماسك ليها مش تبقى خفيفه ولا تقيله
لو حسيتى انها خفيفه ارفعيها على النار مع التقليب علشان
مش تلزق فى الحله ويتحرق البشاميل وبعد كدا ممكن تضفى
عدد 2 بيضه للبشاميل ومش اكتر من كدا لان البيض لو كتر
بينشف البشاميل اوى ...
<<<<<<<<<<<<
>>>>>>>>>>>>
ثالثا : المكرونه :
حطى 3 لتر ميه على النار لحد ما تغلى ولما تغلى حطى معلقتين
زيت ليه بقى ( علشان المكرونه حبتها مش تلزق مع بعضها
يبقى كل حبه مكرونه منفرده مع نفسها كدا :) )
+الملح طبعا مع التقليب المستمر ليها كل شويه
لحد ما توصل للدرجه المطلوبه من التسويه
<<<<<<<<<<<<<
>>>>>>>>>>>>>
رابعا :
جهزى صنيه حجمها يناسب حجم المكونات اللى عملتيها و
ضعى طبقه بسيطه من السمنه وعليها رشه دقيق بسيطه اوى
وبعد كدا ضعى كميه من البشاميل على المكرونه وقلبيها كويس
وبعد كدا حطى نصف المكرونه فى الصنينه ووزيعها كويس جدا
بحيث انها تغطى الجزء الاسفل من الصينيه
وبعد كدا حطى اللحمه برضوا وزعيها كويس على طبقه المكرونه
وبعد كدا حطى باقى المكرونه على السطح ووزعيها كويس جدا بحيث ان
لما تضعى البشاميل مش يجرى وينزل لتحت خليكى ناصحه كدا :(
وبعد كدا طبعا زى ما قولت حطى البشاميل ووزعيه كويس انه يغطى
طبقه المكرونه وبعد كدا وبعد كدا حطى الصينيه فى نار متوسطه
لمده من 30 الى 45 دقيقه
فى بيضه ناقصه انا فاكرها كويس مش تضحكى عليا
البيضه دى هتحطيها على وش البشاميل بس
بعد 20 دقيقه من وضعها فى الفرن
:(
بس خلاص انا تعبت وجعت كمان
تحياتى